..:: صحافتنا ومفهومها لسعوده ::...

:: ملاحضه مهمه ::
قبل الدخول في الموضوع أنا لا أقلل من وضيفه أو مهنه معينه أوشي من هذا القبيل
أتحدث عن مفهوم السعوده لدى صحافتنا.

 
لازالت صحفنا ..في تقوقع رهيب ..
لا تستطيع أن تشاهد شي أبعد من أنفها ..
هذا أن كان لها أنف ..والاكيد أنه ليس لديها أنف ..

كلي عجب ..والله بعد قراءه هذا الخبر في جريده الرياض

هل هذا هو مفهوم السعوده ومحو البطاله لدى صحافتنا ولدى المسؤولين
السعوده التي تؤدي الى محو البطاله هي أن يعمل السعودي في الاعمال المتدنيه وغير السعودي متنعم في خيرات البلد .
السعوده يعني سعودي يشتغل سواق في بيت ...أو يغسل الصحون في مطعم
السعوده ..تعني أن تصبح الفتاه السعوديه شغاله في أحد البيوت ...أو تصبح منظفه لدورات المياه في المستشفيات

لا أعترض على أي عمل ولكن هل وصلت السعوده حدالتشبع لنقنع الشباب بهذه الاعمال من أجل أن تختفي البطاله .

الى هذي الدرجه أكتضضضت مؤسساتنا وشركاتنا أسواقنا ومصانعنا مستشفياتنا ومستوصفاتنا ووو..بالشباب السعودي  
لدرجة أنو يجب على الصحافه توعية الشباب السعودي وعمل تحقيقات بأن العمل كسائق في منزل أو تمسيح الكفرات شي عادي وتوعية الشابات بأن تكون خادمه شي عادي...

:::أين التحقيقات الصحفيه عن تلاعب الشركات والمؤسسات في نسب السعوده وتسجيل أسامي وهميه وهي ليست موجوده .

:::أين التحقيقات الصحفيه ..عن حااااملي البكالوريس والدوبلومات الذين يعملون كاحراس أمن ..
وفي المقابل ..حاملي الابتدائيه من الدول الاخرى ..يستلمون أعلى الرواتب في الشركاتنا ومؤسساتنا ..

:::أين التحقيقات الصحفيه .. عن تطفيش الشباب السعودي المجد الذي فعلا يريد أن يثبت نفسه .

:::أين التحقيقات الصحفيه .. التي تكشف التسيب الحاصل لدى المسؤولين في تطبيق السعوده .

عجيب فعلا عجيب ..مدري مفهومهم لسعوده غلط ...أو ماخذين مبدء ((أمسكلي وأقطع لك))
لكن
مؤسساتهم الصحفيه ..أقرب ماتكون الى السخافه ...منها إلى الصحافه .

::::::::::::::::::::

لما نزلت الموضوع في المنتدى صراحه تفاعل معه كثير من الاعضاء

وسار بيننا نقاش جدا رائع بأحط بعض النقاط الي تناقشنا فيها

المشرفه عسل تقول ((بصراحة الشباب السعودي اعطى ومازال يعطي فكرة شينة عنه))

نور البدر الي هو أنا:أنا معك في أعطى في الماضي قبل خمس ولا عشر سنوات كان يتشرط
لكن ضدك وبعنف في أنو ما زال يعطي ..فكره شينه

عسل أحنى في عصر جديد في فكر جديد في وضع جديد كل شي تغير
ليه نظرتنا لسعودي ما تتغير مع أنو يقدم الكثير ...

والاجنبي الي فرحانه فيه وأنو أنسان يشتغل بذمه ..تضنيه يشتغل علشان سواد عيوننا
تضنيه يشتغل علشان يخلي السعوديه بلد منتجه ورائعه ...
الاجنبي لو مو الراتب يكفيه وزيااااده ما كان جانا السعودي ..ولا تعب نفسه
الاجنبي 1000 ريال تكفيه ...ساكن في عزبه مع عشر هنود قاط كل شهر 200 ريال
وأكل وشارب وساكن ...ويبقى 800 ريال يرسلها لاهله ..800 ريال وش تسوي في الهند
ولا في بنقلاديش ولا في الفلبين ولا حتى في دول العربيه اضاهر دكتور ما ياخذ ربع المبلغ هذا
وما تبيه يكون مخخخخلص إلا يكون مخلص ويمسك بيده ورجله في الوضيفه ...

الي نبيه أنو خلو السعودي راتبه يكفيه بس يكفيه
السعودي الان يطلب رااااااتب الكفااااااف تعرفي وش راتب الكفاف
يعني يبي راتب
1- يقدر يسكن منه
2- أقدر أكل وأشرب منه
3- أقدر أصرف على زوجتي وعيالي منه .

يقول ما أبي راتب يخليني أقدر أتمشى أو قدر أتونس أو أسافر أو أو
لا أبي بس هذي الثلاث طلبات ....
وما أعتقد أنها طلبات دلع أو تعجيزيه ...

عسل قولي لي لما يكون راتب السعودي 1500 ريال بالله عليك بالله عليك تبيه ينضبط في شغله .
يقول السعودي يابشر 1500 ريال وش تسوي
يعني مثلا كان في قريه وحصل الوضيفه في الرياض ب 1500 ريال
بيقول هي تكفي أيجار
ولاتكفي كهرب
ولاتكفي غسيل ملابس
ولا تكفي أكلي وشربي
ولا تكفي بنزين سياره
وللا تكفي جوال لا لالالالا يقول ما أبي جوال عادي أنقطع عن الناس
طيب هل تكفيني والله ما يروح أول أسبوع لين تخلص 1500 ريال

بالله عليك على أيش تبي السعودي ينضبط ولا يخلص في عمله
عطي السعودي راتب يتناسب مع شخص عايش في السعوديه
مو راتب يتناسب مع عيشت هندي في الهند ...

والله حرام المساوه الي زي كذا ..

السعودي ما يبي راتب أكثر من حقه يقول عطوني راتب على قد شهادتي
عطوني أمان وضيفي عطوني راتب أقدر حبه حبه أكون فيه مستقبلي

معليش عسل أنا عصبت وحطيت حرتي فيك  ..

المشرفه العصاميه تقول ((يعني الشاب ، يبغى يتوظف ، بس علشان كذه .. يضمن الوظيفة ..
لا هدف ، ولا طموح .. ويبدأ يهمل ، ويتكاسل وو .. ))

نور البدر الي هو أنا:نتي تطالبي السعودي بطموح تطالبيه بهدف
معليش يعني لما يكون راتبه 1500 أو 1800
وش الطموح وش الهدف الي تبغيه يبنيه وهو على نهاية الاسبوع الاول
قد خلص راتبه ...بتقولي السعودي يبدى ب 1500 بعدين يزيد راتبه
أقلك كم يزيد يعني بعد عشر سنوات يسير 2000
يعني كانك يا بو زيد ما غزيت
ترو يا ناس الشاب السعودي مو عايش في الهند

العصاميه واحد من الشباب ..قدم على شركه قالت له شوف اول شهرين بس نعطيك 1500
واذا شفناك جيد راح نخليك تستمر ويزيد راتبك الى 4000 ريال
تدري وش قال خويي ...قال والله لو قالو ست شهور ب 1500 ريال عادي دام فيه أمل
أنو الراتب يزيد عادي ..
شفتي الشباب السعودي كيف يحب الشغل
بس عطه راتب يقدر يعيش منه يسير زي البشر .

العضو كيوي يقول((لكن ترى النظره عن السعوديين لها أساس "لا دخان بلا نار"..

ما أبغى سعوده, أبغى كفاءه "لو سارت السعوده حتكون مصيبه" ))

نور البدر الي هو أنا:يمكن لو قريت ردودي على الاعضاء راح تحصلني أوفقك هذا الرأي
أنا ماأنكر انو السعودي في فتره من الفترات الماضيه ..وركز على كلمة الماضيه
أعطى فكره سيئه عن السعودي في أنو كسول وأنو أنسان غير مبالي والى أخره من العبارات
وكان هذا الشي هو توجه عام لشاب السعودي ..
لكن الان وش الي ساير
أنعكست الايه ...سار التوجه العام لشباب السعودي هو العمل التعب أثبات الوجود
والامثله كثير ...ياخي لا نروح بعيد .أوكيه ..لما جامعي يتخرج من كليه ما نقول هندسه
لكن أي كليه ثانيه وما يحصل وضيفه ...ويشتغل ..في كبينه تلفون حده 1500 ريال ..وسهر وووو
سؤالي أخوي كيوي
هل مثل هذي العينه الجامعيه الي رضت ب 1500 كان موجوده سابقا أتحدى ما كانت موجوده
بمعنى أخر أخوي كيوي أنو توجه الشباب تغير ..فكر الشاب السعودي سار أكثر نظج
سؤالي أخوي كيوي
هل تعتقد مثل هذا الشاب وزيه كثير ..لما تقول أثبت وجودك في نفس تخصصك الي مليااااان أجانب

وراح أعطي مثلا 3000 ..بالله عليك مراح يمسك فيها بيده ورجليه ..
راح تقول
وش رايك في الدوره الي في نيوزلندا ...أقول لك أنو أكييييييد من المستحيل يكون الشباب

السعودي سار شباب 100 % منضبط ..أكيد فيه فئه مازالت فيه ضياعها ..ولكن أقول فئه وفئه

بسيطه ..من الضلم الفاحش أنو نحكم على الشباب السعودي من خلالهم ..من

الضلم أنو نهمل الفئه الكبيره الي تغير توجهها للافضل ..
فيالماضي لما كانت الفئه المهمله هي السائده كنا نقول الشاب السعودي مهمل
فمن الضلم لما تسير الفئه المثابره هي السائده ونقول برضو الشباب السعودي مهمل

العضو كيوي يقول ((نور البدر , لو تبغي الصراحه: أنا أحسن لي أعيش في مجتمع إللي يمسك
الوظائف فيه ناس فاهمه وعندها إهتمام بوظائفهم سواء هم سعوديين أو غيرهم.
أبغى المدرس حقي وحق أولادي يكون مهتم و مسؤول
أبغى الطبيب حقي يكون ممتاز ومسؤول
* أبغى المحاكم عندنا والدوائر الحكوميه يكون فيها ناس أكفاء ومهتمين "هذي النقطه تبكي من
جد" ما أبغى كلهم يكونوا سعوديين و أتورط أنا ))

نور البدر الي هو أنا:أسمحلي أخوي كيوي ..تقدر تقول عرفت توجهك ..المشكله أنك سعودي 
صدقني الي يقرى كلامك يفهم شي واحد فقط ..
أنك أنسان ((مستحيل تقتنع في السعودي))
بمعنى أخر لو يجيك سعودي دكتور فاهم ..لا لا هذا سعودي أخسرك منه
لويجيك مدرس سعودي بأسلوب جديد .لالا أتركك سعودي مو فاهم ..
وهلم جره على أي وضيفه ثانيه ..
سؤالي لك أخوي كيوي
ليه فرضت أنو السعودي لو توضف في مكان راح يكون مو فاهم ..ليه فرضت أنو السعودي المدرس
مو فاهم ليه فرضت أنو الطبيب السعودي مو متمكن ...
فعلا أثبت عقدة الاجنبي الي يعاني منها الشاب السعودي ..
أنت عطيت الشاب السعودي الثقه وقال لا ...أرجوووووك لا تقول أيه عطينها له قبل عشر سنين
لان الوضع تغير لان ..
أنت حطيت الشاب السعودي مع الاجنبي وقلت له تعلم يا سعودي خذ الخبره لانك راح تكون بداله
براتب يعيشك زي الاوادم ..أرجوووووك لا تقول أذكر واحد سوينا معه كذا وفي الاخير طنش ..لانو
علشان واحد أو ثلاثه سيئين أكنسل مئات يتمنو هذي الفرصه ...
أنت عطيت الشاب السعودي دورات تأهيليه ..وقلت أوضفكم بعد هذي الدورات بدل الاجنبي ..
ياااااكثر الي يتسلفون ويشتغلون دوام ثاني علشان ياخذ دوره في الحاسب يقدر يشتغل فيها .
 والمشكله يقولو لا ناخذ فلبيني أحسن ..شفت الغبن كيف ...عطو هذا الكائن
البشري السعودي فرصه ...خلوه يتعلم ويخطي وبعدين بيكون احسن ....

سؤالي أخوي كيوي
ليه نرضى أنو الاجنبي يخطي في بلدنا وعلى حسابنا مع أنو الواجب يخطي في بلده
ويجينا متعلم .. ونقبل بعيوبه ....
والسعودي لما يخطي من أجل أن يتعلم في بلده ملاحظ معي في بلده ..نعيب عليه ونقول أنت
فاشل ومستغل ..ونرفضه ..
فمة التناقض في تعاملنا ....
 

العضو كيوي يقول ((الخلاصه: ما أبغى سعوده, أبغى كفاءه "لو سارت السعوده حتكون مصيبه"
أتخيل المستشفيات))
نور البدر الي هو أنا:أخوي كيوي زي أنت ما تبغى حياه كريمه أنا برضو أبغى حياه كريمه
خوي كيوي أحنى ما قلنا طبقو السعوده بشكل همجي أبد أبد مو مبتغنا
ليس من المنطق أني أقول شيلو كل الدكاتره والممرضين الي في المستشفيات
أو شيلو الاجنبي الي ماله بديل أبد ما قلنا هذا الشي ..ولو طبقناه بهذا الشكل
بيعتبر شي من السفه .
أحنى نقول ياااااااااااااكثر لاجانب الي في البلد على حساب سعودين بنفس الشهاده
بتقول أيه بنفس الشهاده لكن مو بنفس الكفائه أقول ياااخي مافي أحد يولد عالم حرام عليكم
أرحمو الشاب السعودي شوي ..ياخي ليه ما توضفه براااااتب ولوبسيط وتقول له شوف الراتب
البسيط راح يتحسن لكن تعلم من هذا الاجنبي وخذ منه خبره .وراح تسير مكانه
قسم بالله ليسير أحسن منه ...يكفي أنو بيسير عنده الحس الوطني أنو مجهوده لبلده .
أخوي كيوي أنا أحترم بعنف وجهة نظر ...لكن أقول من الضلم أنو ننظر لاجنبي بنظره
ولسعودي بنظره ....
والعدل يقتضي أن السعودي ياخذ فرصته ..وتعلم ويخطي في بلده ويسير الافضل وماخلق
الاجنبي عالم ما سار عالم إلا بعد ما تعلم على ضهورنا ...يعني حلال الاجنبي
يتعلم على ضهورنا وحرام على السعودي أنو يتعلم ...شفت كيف والله ضلم الشغله ..
أخوي اكيوي أخيرا
أشكرك بعنف  على اثارت بعض النقاط المهمه ..وأسف لو أنفعلت عليك شوي 

جميع الحقوق محفوظه

نور البدر

www.Mzoon.net

nor_albader@hotmail.com  " "  nor_albader@yahoo.com